Лошите резултати на Џеноа се чини повторно ќе донесат промена за Горан Пандев кога станува збор за тренерското столче.
Нашиот најдобар фудбалер откако е во Џеноа смени повеќе тренери отколку во целата своја кариера, барем така изгледа. И сега повторно е на повидок нова промена.
И покрај засилувањата и солидниот состав кој го направи во летниот трансфер период, Џеноа бележи очајни резултати и по 9 кола е претпоследна со само 5 бода, односно 1 победа и 2 нерешени зачинети со дури 6 порази (меѓу кои и 6:0 од Наполи).
Синоќа „Блучеркјатите“ повторно загубија и тоа на домашен терен од конкурентот за испаѓање, Парма. Нашиот Пандев почна од клупата и влезе во игра во 69. минута кога гостите водеа со 1:2, но не успеа да помогне Џеноа да избегне пораз.
Роландо Маран го презеде кормилото на Џеноа кон крајот на август, а информациите кои доаѓаат од Чизмата велат дека претседателот Енрико Прециози веќе го загубил трпението со него и на повидок е смена.
И тоа смената веројатно ќе биде со никој друг туку Давиде Никола, тренерот кој беше токму пред Маран. Никола ланската сезона успеа да избори опстанок со тимот, но беше сменет иако неговиот договор сѐ уште важи бидејќи е до 30 јуни 2021 година, па фактички Џеноа периодов дава плата на два тренера, од кои едниот бележи лоши резултати, а другиот не доаѓа на работа.
Што и да реши Прециози, и натаму ќе плаќа два тренера бидејќи со Маран потпиша на две години. Маран има еден џокер во ракавот, а тоа е одличниот резултат во Копа Италија каде успеа да го елиминира ривалот Сампдорија во градското дерби.
