Горан Пандев постигна одличен гол за Џеноа чиј нов тренер Тијаго Мота влезе во аналите откако сите три замени кои ги стави во игра постигнаа гол.
Натпреварот почна лошо за Мота откако Сандро Тоанли донесе водство за гостите од Бреша кои го добија првиот дел.
Во второто полувреме Мота направи три измени кога сѐ уште Бреша имаше водство. Влегоја во игра Кевин Агудело, Горан Пандев и Кристијан Куаме и тогаш Џеноа се препороди.
Прво Агудело израмни во 66-тата минута, Куаме донесе водство со пресврт во 75-тата, а само 4 минути подоцна Пандев со прекрасен погодок ја запечати победата на Џеноа, прва после 6 натпревари.
Ова е прв гол за нашиот Пандев сезонава. За Мота пак ова е историја бидејќи во Серија А никогаш до сега не се случило тројца играчи кои влегле од клупата да постигна гол.
Инаку, Пандев и Мота беа соиграчи во Интер кога „Нераѕурите“ ја освоија Лигата на шампиони во 2010.