Гостувајќи во емисија на својот клуб, Горан Пандев даде поддршка на вакцинацијата и порача дека сите треба да се вакцинираат.
Македонскиот капитен беше гостин во емисијата „Due passi con“ која е во реализација на неговиот клуб Џеноа. Меѓу останатите работи, беше прашан и за пандемијата, неизбежно прашање на кое веќе сите се навикнавме.
„Поминавме многу тешка година, не само фудбалски, туку во секој дел од животот. Долго време не си ги гледавме роднините, не можеме заедно да седнеме на вечера, не ги правиме повеќе оние работи кои бевме навикнати да ги правиме. Сега живееме еден титално различен живот и се надевам дека овој ковид што поскоро ќе го снема за да се вратиме во нормала“, рече Пандев.
Бидејќи сега актуелна е вакцинацијата против COVID-19, како во Македонија, така и во Италија, Пандев беше прашан дали верува во вакцините или е меѓу оние антиваксерите.
„Секако дека верувам во вакцините. Треба сите да се вакцинираме и на овој начин можеби сите ќе живееме помирно. Насекаде гледам исплашени луѓе кои не знаат што да прават. Можеби сега откако излегоа вакцините ќе можеме да бидеме помирни“, додаде тој.
Токму поради тоа што пандемијата сѐ уште трае во Европа и многу малку луѓе се вакцинирани, Пандев и репрезентацијата на Македонија нажалост нема да играат пред полни трибини на претстојното ЕУРО.