Најдобриот македонски фудбалер полека наближува до бројката од 100 гола во Калчото откако синоќа стрелаше прецизно на гостувањето кај Удинезе. Во дербито на денот, Наполи успеа да ја совлада Рома.
Горан Пандев и Илија Несторовски синоќа се разминаа. Првиот почна на клупата и влезе во игра во 59. минута и тоа само минута откако Иле беше изваден од игра.
Токму нашиот Горан во 81. минута постигна гол со кој ја врати надежта на Џеноа намалувајќи на 2:1. На крајот неговиот тим се избори за бод со гол од одбиена топка по промашен пенал длабоко во судиското надполнување. За Пандев ова беше гол број 93 во Серија А со што сега е на 7 гола од клубот 100. Ова му е осми гол сезонава, која му е и најефикасна откако е во Џеноа.
Дербито на денот се играше во Неапол каде домашниот Наполи ја пречека Рома во популарното Дерби дел Соле. Хосе Каљехон во 55. минута донесе водство за домашните, но само пет минути подоцна Хенрих Мхитарјан израмни на 1:1. Трите бода за Наполи ги донесе Лоренцо Инсиње во 82. минута. Нашиот Елиф Елмас влезе во игра во 85-тата.
Аталанта ја продолжи серијата победи откако со минимални 0:1 славеше на незгодното гостување кај Кањари. Победоносниот гол беше дело на Луис Муриел од белата точка откако младиот Андреа Карбони стартуваше недозволено и притоа ги остави домашните со 10 играчи.
Фиорентина славеше на гости кај Парма со 1:2 во натпревар во кој сите голови беа постигнати од белата точка. Чилеанецот Ерик Пулгар во првиот дел двапати го совлада Луиџи Сепе, а за домаќините прецизен беше Јурај Куцка.
По дури 14 натпревари пост екипата на Бреша конечно се израдува на победа. Со головите на Андреа Папети и Алфредо Донарума непријатно ги изненадува гостите од Верона кои планираа да се вратат дома со три бода.
Интер им приреди ново разочарување на своите навивачи откако на свој терен прокоцка водство над Болоња и на крајот дури и загуби. Ромелу Лукаку во 22. минута донесе водство, потоа во 57. минута гостите останаа со играч помалку откако Роберто Соријано заработи директен црвен картон, а пет минути подоцна Лаутаро Мартинес промаши пенал за 2:0 откако голманот Лукаш Скорупски го одбрани неговиот удар.
Потоа на сцена стапија интернационалците од Гамбија, Муса Џувара и Муса Бароу кои се погрижија за целосен пресврт и големи три бода за тимот на Синиша Михајловиќ. Во меѓувреме, силите на теренот се израмнија откако Алесандро Бастони заработи исклучување.
Сампдорија освои важни три бода во борбата за опстанок откако го совлада СПАЛ со 3:0. Сите три гола паднаа во првиот деч и тоа два од Карол Линети и еден од Маноло Габјадини.