Најдобриот македонски фудбалер на денешната прес-конференција најави дека утре Македонија ќе оди на победа против Грузија во борба за првото место во групата и покрај заморот поради згуснатиот распоред.
Киксот во Талин ќе мора да се поправи утре, иако победа утре секако беше планирана. Нашиот капитен расположено најавува борба за трите бода.
Но, пеколниот ритам од три натпревари во 9 дена значи и дека утре, на последниот од тие три, можеби и двете репрезентации ќе се соочат со умор. Повторно се можни рокади во почетниот состав на селекторот Игор Ангеловски откако веќе е јасно дека неколкумина отпаднаа, а беа повикани и нови играчи..
„Сите што сме овде конкурираме за првите 11. Знаевме дека нѐ очекува еден пеколен ритам, играме секој трет ден и свесни бевме сите дека ќе добиеме шанса“, почнува Пандев.
Победата ја планираме, но таа треба да се одработи на терен. Грузија не само што во ноември ни е пречка за пласман на ЕУРО, туку и овде, во Лигата на нации ни е главен кокурент за првото место и пласман ранг погоре.
„Ние на секој натпревар влегуваме 100 посто, сакаме да победиме, но имаме и противник, фудбал е и не може секој пат да победиш. Утре ни останува овој последен натпревар и мислам дека ако го добиеме ќе завршиме први во оваа група бидејќи тоа е наша цел и се надеваме дека со една добра игра и со победа ќе го завршиме овој дел“, смета Горан.
Пандев во Талин почна од клупата, шанса добија некои од резервистите, а можно е и утре да има промени во составот.
„Ги почитувам сите, и млади и стари, сите што сме во репрезентацијата. Овие што сме тука сигурно ќе го дадеме максимумот. Ни се придружија некои нови играчи, сигурно нивниот квалитет ќе ни помогне и се надеваме на еден добар резултат. Знаеме Косово колку и физички и психички нѐ истроши, но спремни сме утре да излеземе и да го добиеме овој натпревар“.