Самостојната изложба слики, цртежи и инсталации „Утопија“ на визуелната уметница Пандора Апостолоска Саздовска и поставката скулптури и цртежи „Објекти“ на скулпторот Сашо Саздовски ќе бидат поставени во Галеријата за современа уметност Арт Хаб ОАЕ во Дубаи од 12 ноември.
Поставувањето на изложбите на двајцата истакнати македонски уметници се случува во исто време со Саемот за уметност во Абу Даби и Саемот за дизајн во Дубаи Дизајн Дистрикт Д3.
Изложбата ќе ја отвори г-ѓа Елма Алторок од Амбасадата на Република Македонија во Абу Даби. Проектот е поддржан од Министерството за култура на Р. Македонија. Куратор на проектот е Златко Теодосиевски.
Делата на скулпторот Сашо Саздовски се засноваат на прашањето за бесконечноста како одраз на нашето ограничено постоење во времето и просторот. Огромните, апстрактни димензии надвор од нашето разбирање секогаш ги поттикнуваа експериментите на уметникот во потрагата по сопствени, уникатни одговори. Постојаниот проток на енергија е доста провокативен во неговото континуирано патување низ скулптурата.
Проектот „Објекти“ на Сашо Саздовски е комбинација на мермер, дрво, метал и плексиглас. Неговите експерименти со различни медиуми се видливи и без оглед на нивната димензија тие имаат монументалност. Некои од скулптурите се решенија за идни архитектонски проекти.
Визуелната уметница Пандора Апостолоска Саздовска користи мултидисциплинарен приод во нејзината работа комбинирајќи сликарство, фотографија, објекти и инсталации. Нејзиниот стил е минималистички со монохроматска палета. Следејќи ја теоријата на духовното во уметноста, таа инсистира на белото како апсолутна тишина која допира до гледачот, „како многуте паузи во музиката што привремено ја нарушуваат мелодијата“ (Василиј Кандински). Нејзината уметност генерално е фокусирана на човечките односи кои ги истражуваат аспектите на војната и насилството како политички и социолошки феномен, вклучувајќи различни аспекти на ненасилна агресија во современото живеење.
Проектот „Утопија“ на Пандора Апостолоска Саздовска е платформа за социолошки истражувања и подигнување на јавната свест за главните глобални политички и еколошки проблеми во светот.
