Panini шегаџии: Ангеловски доби сликичка, Кулушевски залепен кај Македонија

Македонските граѓани масовно го раскупуваа албумот на Panini, па стигнаа и првите досетки.

Во албумите на Panini, без разлика дали се работи за Европско или за Светско првенство, одамна веќе нема сликички од селекторите. Последен пат тоа беше случај со албумот за ЕУРО 1992.

Еден македонски колекционер, мотивиран од две причини, направи сликичка плус. Така, селекторот Игор Ангеловски доби своја сликичка која колекционерот ја смести токму врз зборот North од името на македонската репрезентација, па со еден удар заврши две работи: селекторот заслужено има сликичка, а сега не му боде очи новото име на републикава.

Друга шега објави порталот MacedonianFootball каде еден од нивните новинари сликичката од Македонецот Дејан Кулушевски, кој е роден и израснат во Шведска за чија репрезентација и настапува, ја залепил во делот наменет за македонската репрезентација. Несомнено Кулушевски ќе беше одлично засилување за Македонија, но за жал, и покрај големите молби од селекторот Ангеловски, тој одбиваше да го облече дресот со сонцето.

Како што може да се забележи, Кулушевски е залепен на местото каде треба да биде Тихомир Костадинов, па оттука се прашуваме дали Костадинов ќе го залепи кај Шведска или Кулушевски ќе биде залепен и во двете репрезентации.