Додека македонските фудбалски навивачи се во исчекување да го видат дресот со кој Македонија ќе настапи на претстојното ЕУРО, папата Франциск имаше чест не само да го види новиот дрес, туку и да го добие како подарок.
Македонскиот претседател Стево Пендаровски се наоѓа во Рим каде посетата по повод чествувањето на сесловенските просветители Свети Кирил и Методиј во Ватикан го искористи и за средба со папата на кој му подари и дрес од фудбалската репрезентација.
Папата всушност го доби новиот дрес изработен од германкиот производител Jako со испишано неговото име на грбот и тоа на кирилица.
Претседателот Пендаровски на Facebook објави и фотка од моментот на подарувањето на дресот, но тој се гледа само од задната страна.
Она што го привлекува вниманието на прв поглед е чудната боја која не личи на македонската црвена и повеќе наликува на бордо, односно на дресовите на Венецуела и Торино.
Воедно, од страните под ракавите има бела боја, што дефинитивно е разорачување бидејќи очекувана беше жолта боја.
Останува да видиме каков дизајн има предната страна, но судејќи според изгледот назад, Македонија нема да игра со сонце на градите како што очекуваа навивачите. Но, да почекаме ФФМ да го претстави новиот дрес пред да судиме.