Група ултраконзервативци во Католичката црква го обвинија папата Франциско дека шири ерес и го повикаа да се откаже од своите еретички активности, „што е можно поскоро“.
Се работи за протест против документот „Аморис Летиција“ со кој папата ја ублажи долгогодишната забрана за причестување на луѓе кои се разведени па повторно венчани.
„Ние сме принудени да и испратиме на вашата светост исправка поради ширењето на ерес во апостолската порака ‘Аморис Летиција’“, се наведува во писмото до папата упатено од 62 негови критичари.
Тие го критикуваат папата и поради, како што наведуваат, незапаметената симпатија кон Муртин Лутер, чии идеи за бракот, разводот и божествените закони, Франциско наводно ги промовира.
Меѓу потписниците на ова писмо е и поранешниот директор на ватиканската банка Етор Готи Тедески, кој изјави дека го сака папата и дека самото писмо е чин на приврзаност и обид да му се помогне на папата да ја исправи својата грешка.