Неславно ја напушти Аталанта, а уште на деби натпреварот за својот нов клуб постигна гол од дваесетина метри.
Алехандро Гомес од септември 2014 ги бранеше боите на Аталанта, беше капитен и предводник на ренесансата кај популарната „Деа“. Но, на 1 декември, кога тимот играше натпревар од Лигата на шампионите против дански Митјуланд, Папу Гомес се испокара со тренерот Џан Пјеро Гасперини и тоа поради позицијата на која треба да игра. Не излезе од соблекувалната да го игра второто полувреме и оттогаш односот со тренерот само се влошуваше.
Последен пат се појави во црно-синиот дрес на 16 декември против Јувентус, а потоа побара да си замине од Аталанта. Претседателот, со кој имаше добри односи, му дозволи да си оди напоменувајќи му дека не може да оди во друг клуб од Италија.
Така, Папу Гомес на 26 јануари потпиша за шпанска Севиља, а викендов го имаше своето деби во Ла Лига откако претходно настапи на натпревар од Копа дел Реј. Во 57. минута влезе на местото на повредениот Лукас Окампос, а на три минути пред истекот на времето од дваесетина метри упати една бомба, која со помош и на дефанзивецот Ерик Кабако, кој неумешно постави блок, ја затресе гостинската мрежа за водство од 2:0.
Севиља потоа погоди и по трет пат за конечни 3:0.