Партиите засега се далеку од договор за датум за предвремени парламентарни избори. СДСМ со став дека доколку нема договор, тогаш по сила на закон, изборите ќе се одржат на 21 јуни. Наспроти нив, ВМРО-ДПМНЕ смета дека избори треба да има тогаш кога нема да биде загрозен ниту еден човечки живот и кога граѓаните ќе се чувствуваат слободни да учествуваат на изборен процес.
Од владејачката СДСМ велат дека по ставањето на пандемијата под контрола, силно се посветени на носење економски мерки за брза трансформација на економијата. Сега, како што посочуваат, потребно е градење на функционални и институции со целосен легитимитет и затоа се потребни парламентарни избори во првиот можен рок.
Според Комисијата за заразни болести и според надлежните институции, како што велат од СДСМ, создадени се услови за одржување на предвремените парламентарни избори, секако со целосно почитување на протоколите за заштита на здравјето.
Опозициската ВМРО-ДПМНЕ смета дека во овие моменти потребно е трезвено размислување и надполитички став кој ќе биде во интерес на граѓаните и нивното здравје, а не во интерес на политичките партии.
Според нив, организирање на предвремени парламентарни избори во време на пандемија која секојдневно одзема животи е еднакво на организирано убиство, за кое за жал ќе нема назад.
И Движењето БЕСА со став дека секој обид за пролонгирање на изборите оди на штета на граѓаните.
– Секој обид за пролонгирање на изборите со оправдување без аргументи оди само на штета на граѓаните. Затоа апелираме до сите политички фактори да не си играат со судбината на граѓаните, туку сериозно да им пристапат на создадените околности и да не се пресметуваат за политички придобивки што би наштетило на интересот на граѓаните, велат од БЕСА.
Членовите на Државната изборна комисија (ДИК) вчера побарале дополнителни одговори за мерките за избори од Комисијата за заразни болести. Министерот за здравство Венко Филипче информира дека во следите денови Комисијата ќе одговори на прашањата на членовите на Комисијата, а исто така рече дека тие, односно државата, би можела да одговори на потребата за заштитни материјали за изборите имајќи предвид дека станува збор за голема бројка.
На втората лидерска средба кај претседателот на државата, што се одржа во понеделникот, партиските лидери не постигнаа консензус за датум за предвремени парламентарни избори. Првично овие избори беа закажани за 12 април, но поради пандемијата со коронавирусот и вонредната состојба тие беа одложени со владина Уредба со законска сила.
