Христијанско-демократската унија (ЦДУ) на Ангела Меркел и сестринската партија од Баварија Христијанско-социјална унија (ЦСУ) ја претставија нивната прва заедничка програма за Европските избори во кои ја претставија нивната визија за иднината на ЕУ.
Во нивните планови предвидуваат ефикасни контратерористички сили и европска војска.
Актуелната шефица на ЦДУ и наследничка на Ангела Меркел, Анегрет Крамп-Каренбауер, нејзиниот колега од ЦСУ Маркус Содер и водечкиот кандидат од Европската народна партија (ЕПП) Манфред Вебер кој претендира за позицијата претседател на Европската комисија, го претставија нивниот прв заеднички концепт за идниот развој на Европа.
Во нивната изборна програма има планови за создавање на Европски сили до 2030 година и за зајакнување на областите надворешна политика, одбрана и безбедност на Европа, како и на граничната служба на ЕУ - Фронтекс – која би добила 10.000 нови службеници ако програмата биде имплементирана.
Еден од предлозите е унифициран систем на податоци и интензивна размена на информации меѓу ЕУ и земјите членки.
Ова е со цел да се создаде побезбедна Европа, да се намали организираниот криминал и тероризмот. Исто така, партиите предлагаат создавање на заедничка база на податоци на ниво на ЕУ за алармирање за потенцијални терористи.
„Она што ни треба во Европа е единство за безбедноста. Поголема безбедност во и низ Европа ќе значи и поголема безбедност за Германија... Ние би сакале да ги прошириме програмите за размена и партнерство меѓу агенциите за безбедност. Европската полициска служба Европол мора да се трансформира во европско ФБИ“, стои во нивниот изборен манифест.