Павле Камилоски е автодидактички македонски баритон чија љубов кон музиката не познава граници. Тој поседува толку многу енергија и инспирација што овој пат под отворено небо на плоштад Мајка Тереза го организира настанот „Мала Италија патува“ на 20 јуни во 20 часот. Павле вложува толку многу во исполнување на својот сон и во надградбата на својот талент што животот го одведе до Раме Лахај, најбараниот тенор во Европа.
Со Павле разговаравме за нивната соработка и пријателство:
На почетокот на годината Вашиот пат Ве однесе во Париз и таму ја имавте шансата да се запознаете со еден од најбараните тенори во Европа. Дали може да ни кажете како беше кога прв пат се запознавте со Раме Лахај?
„Во животот имам една теза по која најчесто се водам, а тоа е дека ништо не е случајно, се е со одредена причина. Универзумот ми го донесе Дритон Гаџа во комплексот Македонско село, каде што работам, да престојува на два дена. По запознавањето со Дритон, тој како врвен уметник, покрај убавите сугестии и насоки за музиката, ми предложи да се запознам со Раме. Тој ми рече ‘Раме моментално е во Париз. Зошто не отидеш да го посетиш? Од каде знаеш каква соработка би имал?’
Му испратив снимка на Раме да ме слушне како вокал. Од истата беше пресудно нашето видување. Кога го замислував Париз како дестинација ми беше многу возбудливо, а најмногу затоа што одев со цел. Едноставно знаев и чувствував дека ќе ми се сменат доста работи. Така и се случи. Кога го остварив првиот телефонски разговор со Раме и кога ми рече да се најдеме пред Opera de Paris ми беше како во сон. Имав волшебен и прекрасен престој. Просто не ми се веруваше што ми се случува... Пеењето, љубовта покрај мене, убава храна, француско вино и Париз.“
Како почна Вашата соработка? Која е емоцијата што Ве води Вас и господин Лахај?
„Верувам дека само човек кој го изодел потешкиот пат во животот и кој мечтаел да го оствари својот сон може да ги отвори своите врати на таков начин како што направи Раме. Тој ме прими како најдобар пријател! Бев фасциниран од неговата скромност, и сфатив како еден великан треба да се однесува. Успеа да го извади најдоброто од мене, работејќи интензивно на техниката и насочувајќи ме во најдобриот можен правец.“
Како се одвиваат Вашите сесии? Кои се методите преку кои го надградувате Вашето знаење и пеење?
„По заминувањето од Париз бев цврсто решен во која насока треба да продолжам. Мотивот и љубовта беа уште поголеми. Со исклучително нетрпение чекав да продолжам со надградување на вокалните способности. Енергијата која му ја вратив на универзумот ме однесе до вистинскиот ментор, Проф. Горан Начевски при Факултет за музичка уметност.
Постои едно верување дека кога ученикот е подготвен за работа, тогаш се појавува учителот. Како и секоја професија, така и пеењето бара многу посветеност, жртва и одрекување од многу работи.“
Како е чувството да соработувате со тенор од рангот на Лахај и како истата соработка ќе Ве мотивира за Вашиот настап на „Мала Италија патува“?
„Раме Лахај ми е потсвесен двигател во пеењето.
Тој ми рече ‘Драг пријателе, искористи го тоа што го поседуваш, стани свесен за својот потенцијал и притоа немој да ме гледаш мене ниту пак да се споредуваш со мене, јас сум јас, а ти си ти. Тргни ги на страна моите успеси. Ако напорно работиш на тоа што вистински го љубиш никогаш не можеш да знаеш каде ќе те однесат патиштата.’
Едноставно е. Кога правиш нешто со љубов, со љубов и се враќа. Ни на сон не ми дошло дека Мала Италија ќе прерасне во настан со толку големи подготовки! И така започнаа патувањата на Мала Италија и ова ќе биде нејзино трето традиционално претставување.“