Долорес О’Риордан, пејачката на бендот „Кренберис“ жената на чиј глас сите се восхитувавме, почина вчера на 46 години. Долгогодишната битка со депресијата е резултат на сексуалното злоставување кое го доживеала кога била дете, односно на само осум години.
Долорес беше пронајдена мртва во хотелска соба во Лондон, а полицијата излезе со кратко соопштение дека починала под „неразјаснети околности“ и дека истрагата е во тек.
Набргу откако тажната вест го обиколи светот, нејзини колеги и обожаватели на социјалните мрежи ја искажаа својата тага преку разни нејзини стихови, сеќавање на концерти, но и стари новинарски текстови.
Меѓу нив се најде и едно постаро интервју, во кое Долорес зборува за депресијата и биполарното пореметување.
Долорес во 2013 година се обидела да изврши самоубиство.
Мајката на три деца се предозирала, бидејќи страдала од депресија која резултирала со нервен слом.
„Се мразев самата себеси и се обидев да се предозирам. Омразата која ја чувствував кон себе се манифестираше преку моето однесување – пореметување во исхраната, нервни напади, се обидев и да се убијам, но не успеав, судено ми е да останам овде, покрај моите деца“, изјавила пејачката во 2014 година.
Набргу после ова признание, следеше и сеќавање на еден немил настан поради кој се мразела самата себеси.
Пејачката откри дека била жртва на сексуален предатор во осмата година од животот.
„Имаше моменти кога се борев. Смртта на моите татко и свекрва ме поразија. Кога ќе погледнам наназад, мислам дека депресијата, која и да е причината за неа, е најлошата работа низ која поминувате“, изјавила пејачката.
Долорес ќе остане запаметена по својот неверојатен глас и неколкуте безвременски хитови кои ги остави зад себе.