Германската влада побара мерки за заштита на женската публика на домашниот култен метал бенд „Rammstein“, по обвинувањата против пејачот на групата за сексуална злоупотреба.
„Особено младите мора да бидат подобро заштитени од агресија“, изјави германската министерка за семејство Лиза Паус од Зелената партија, додека „Rammstein“, еден од најпознатите европски метал бендови е на турнеја низ целиот континент.
Посебно, министерката предложи на концертите да се воведат заштитни зони за жени и тимови кои би можеле да интервенираат во случај на сексуална злоупотреба.
Треба брзо и конкретно да разговараме за заштитните мерки, побара министерката, истакнувајќи дека би било „корисно да се води сериозна дискусија за одговорноста на уметниците и организаторите кон посетителите на концертот“.
Пејачот Тил Линдеман е обвинет за сексуална злоупотреба од неколку жени, објавија деновиве државната телевизија NDR и весникот Süddeutsche Zeitung.
Пејачот е осомничен дека избрал група девојки од првите редови на концертите кои ги поканил на забавата по концертот. Две девојки тврдат дека на тие забави биле дрогирани и принудувани на секс, што бендот го демантираше.
Според истрагата на неделникот Die Welt, опишан е целиот систем во службата на пејачот, во кој девојките од првиот ред биле снимани и фотографирани за Линдеман (60) да може да ги избере оние што му се допаѓаат.
Оваа недела на „Олимпиаштадион“ во Минхен треба да се одржат четири концерти, каде што нема да има први редови пред бината од која пејачот избирал девојки.
„Организаторот нѐ информираше вчера дека нема да има простор за Row Zero или забава по концертот овде“, изјави за AFP, Тобиас Колер, портпарол на стадионот на кој ќе настапи бендот.
„Rammstein“, кој е основан во 1994 година и се откажа од провокациите во своите музички спотови, во наредните недели треба да одржи концерти во Франција, Италија, Швајцарија, Шведска, Белгија, Холандија, Полска и Австрија.