Легендарниот бразилски фудбалер Пеле никогаш не штедел зборови кога се во прашање неговите колеги, но мора да се забележи дека неговиот фудбалски талент е далеку поголем од талентот за давање добри изјави за медиумите.
Кога и да проговори, кажува нешто контроверзно, па така беше и овојпат. Последната изјава на Пеле се однесуваше на Лионел Меси и се однесуваше на „слабостите“ на петкратниот освојувач на Златната топка.
Не само што не е најголем фан на Лионел Меси, туку Пеле изгледа дека не го вреднува Аргентинецот толку колку што го вреднуваат фановите на модерниот фудбал. Според бразилската легенда, Меси има многу слабости во играта кои го прават полош фудбалер од фудбалските легенди од минатото, вклучувајќи го и самиот Пеле.
„Како можете да го споредите некој што беше добар со топка, шутираше со лева и десна нога и постигнуваше голови со глава, со некој што кој зависи од неговата лева нога, еднодимензионален е и притоа не игра добро со глава? Кога ќе го споредувате некого со Пеле, тоа мора да биде некој што е квалитетен во сите аспекти од играта“, вели 78-годишниот Бразилец.
Изгледа дека Пеле не го гледал финалето од Лигата на шампионите во 2009 година, кога Меси го најави неговото пристигнување помеѓу великаните со голот со глава кој испадна кобен за тимот на Манчестер Јунајтед.
„Диего Марадона е еден од најдобрите фудбалери на сите времиња. Ако ме прашувате дали тој е подобар од Меси, би рекол дека е. Многу подобар. Исто како Франц Бекенбауер и Јохан Кројф. Сите тие се одлични играчи“, додаде Пеле.