Ѕвездата на ПСЖ често е критикувана поради глумата која ја прикажува на теренот, посебно за време на овогодинешното Светско првенство, кога тоа на моменти преминуваше во фарса. Неговиот сонародник Пеле вели дека не го поддржува неговото однесување иако признава дека се работи за специјален талент.
Нејмар е секогаш на мета на критики поради симулирање прекршоци, а критиките одат дотаму што некои луѓе велат дека глумата е неговиот најголем квалитет.
Бразилската репрезентација беше поразена од Белгија во четвртфиналето од Светското првенство и Нејмар остана разочаран бидејќи многумина ја сметаа бразилската репрезентација како фаворит за освојување на Мундијалот. Најголемиот фудбалер на Бразил на сите времиња, Пеле, вели дека не може да го одбрани неговиот помлад сонародник од критиките.
„Тешко е да го одбранам Нејмар за неговата глума и сите оние работи кои ги прави освен што игра фудбал. Секогаш се обидувам да го потсетам за неговите квалитети и истото му го кажав на нашата последна средба. Му реков дека Бог му го дал фудбалскиот дар и треба да го негува наместо да си ја комплицира ситуацијата“, изјави Пеле.
Споредбите помеѓу Нејмар и Мбапе веќе почнаа да се случуваат, иако Французинот е седум години помлад од бразилскиот соиграч. Пеле вели дека Нејмар и понатаму е поквалитетен играч од Мбапе, но разбира зошто светските медиуми зборуваат за францускиот тинејџер.
„Мбапе го споредуваат со мене и со Нејмар а јас можам да ги видам сличностите. Сметам дека Нејмар е покомплетен играч од Мбапе, но гледам зошто светските медиуми зборуваат за Французинот“, додаде Пеле.
Тимот на ПСЖ силно чекори кон нова титула во француската Лига 1 иако викендов ги испушти првите поени во домашното првенство. Бордо успеа да одигра 2:2 против ПСЖ а Нејмар се најде на листата на стрелците.