Одложениот натпревар од синоќа се одигра денеска на бреговите на Охридското Езеро каде Пелистер успеа да остане непоразен протов Ренова.
И по 21 одиграно коло во 1.МФЛ прежалениот и веќе со една нога испаднатиот Пелистер останува без победа. Денеска успеа да остане непоразен во дуелот со Ренова, тим кој се бори за излез во Европа, со тоа прекинувајќи ја низата од 5 последователни порази.
Натпреварот требаше да се одигра синоќа, но поради снегот на „Под Тумбе Кафе“ стадионот во Битола беше одложен и преместен за во Охрид.
„Зелено-белите“ поведоа преку Бобан Здравевски по еден контра напад во 15. минута. Гостите од Џепчиште израмнија во 1. минута од надополнувањето пред паузата преку Албан Таипи кој погоди со глава.
До крајот Ренова не успеа да постигне победнички погодок и да ги освои планираните 3 бода против фенерџијата.
За Пелистер, кој е закован на дното од табелата, ова е само шести бод и тоа сите освоени како нерешени. Битолчани сезонава се немаат израдувано на победа. Ренова останува 5-та, сега со 31 бод.