Во игра остана актуелниот шампион Силекс, а главните фаворити Шкендија и Шкупи доживеаја елиминации откако на сите три натпревари победникот беше решен по изведувањето на пенали.
Во Тетово, Шкендија ја пречека Струга и иако имаше повеќе од играта, не успеа да го најде патот до гостинската мрежа. Натпреварот заврши без голови, а во пенал рулетот поуспешни беа стружани со 3:4. За Шкендија промашија Сундрит Гури и Валмир Нафиу, а за гостите само Валентин Кочоски.
Во скопската населба Ѓорче Петров, „Лавовите“ успеаја да го исфрлат лидерот на Првата лига, Шкупи, исто така на пенали. И таму мрежите мируваа 90 минути, а во пенал-серијата играчите на Македонија ЃП беа сигурни, додека Марјан Радески и Фреди Алварес промашија за Шкупи за конечни 4:1.
И во Кратово беше неизвесно, но таму барем публиката виде и два гола. Две минути по паузата Брегалница поведе преку Милан Џокиќ, а десетина минути подоцна Антонио Каланоски донесе израмнување. Овде пенал-серијата отиде во шест серии каде голманот Даниел Божиновски го одбрани одлучувачкиот пенал на Марјан Алтипармаковски и го прати Силекс во полуфинале. Претходно за штипските „Сини“ промаши и Антонио Азиновиќ, а за кратовци Стојан Стојчевски.
Се одиграа само три натпревари бидејќи дербито Пелистер - Вардра во Битола не ни започна поради снег и замрзнат терен.
Полуфиналните натпревари ќе се играат напролет, а засега е непознато дали ќе се чека прво да се одигра преостанатиот натпревар или жрепката ќе биде направена и без него.
