Претседателот Стево Пендаровски прогласи нова вонредна состојба во траење од 14 дена поради кризата со COVID-19. Како причина за тоа ги наведе спроведување на економско-социјалните мерки.
Пендаровски по седницата на Советот за безбедност потенцираше дека во врска со продолжувањето на вонредната состојба се консултирал со повеќе експерти.
Тој по седницата рече дека Советот за безбедност заклучил дека надлежните институции работат координирано и оти ситуацијата е подобрена и оти евидентно е дека како држава добро се справуваме со коронакризата.
Втората триесетдневна вонредна состојба поради пандемијата со коронавирусот завршува на 16 мај.
На денешната седница на Советот за безбедност, се разговараше за евентуално трето продолжување на вонредната состојба поради коронакризата. Предлогот за трето продолжување на вонредната состојба, која истекува утре, до Советот го доставува Владата, а таа претходно денеска излезе со став дека ќе бара од претседателот Стево Пендаровски нови 30 дена вонредна состојба.
– Владата на Република Северна Македонија на денешната 53. седница донесе заклучок да достави предлог до Претседателот на Република Северна Македонија со извештај за досега преземените активности од државните институции, со кој се аргументира дека за успешно справување со коронавирусот во државата потребна е вонредна состојба и во наредните 30 дена, е дел од заклучоците од денешната 53. владина седница.
Министерот Венко Филипче вчера најави дека ќе биде побарано продолжување на вонредната состојба, но не прецизираше дали ќе се бараат нови 30 денови или помалку.
