Стратегот на Манчестер Сити не го смета својот тим за фаворит за титулата во Лигата на шампионите сезонава, бидејќи, како што вели, тоа го сфатил гледајќи ја играта на неговиот поранешен клуб Баерн.
Каталонскиот тренер смета дека бранителот на тронот, минхенски Баерн, и оваа сезона е главен фаворит за титулата.
„Кога го гледам Баерн како игра, сфаќам колку само ние не сме фаворити. Мојата цел во моментов е Вест Хем со кого играме за три дена“, вели тој зборувајќи за BT Sport.
„Ако луѓето велат дека сме фаворити, мора да го прифатиме тоа. Но, клуб кој во целата своја историја стигнал само еднаш до полуфиналето, да се смета за фаворит? Ок, така нека велат, мораме да го прифатиме тоа“.
Навистина, Манчестер Сити не може да се пофали со некој голем успех во Лигата на шампионите. Во последните 10 сезони редовно настапува, но ниту еднаш не дојде до финалето. Најдалеку што стигна беше во сезоната 2015/16 кога во полуфиналето беше елиминиран од Реал Мадрид и тоа со еден гол во двата натпревара. Всушност, овие 10 сезони се е единствени за клубот откако натпреварувањето се вика Лига на шампиони, а претходно во Купот на европските шампиони имаше само еден незабележителен настап.
Синоќа „Граѓаните“ славеа на гости против Борусија Менхенгладбах со 2:0 и со едната нога се во четвртфиналето.
