Првиот човек на Реал Мадрид и воедно и првиот претседател на европската Суперлига, Флорентино Перес проговори за конфликтот меѓу дванаесетте најбогати клубови и УЕФА.
Според него, големите тимови едноставно мора да ги зголемат своите приходи и со тоа ќе профитираат и сите останати европски клубови.
Перес вели дека неговиот Реал Мадрид, како и Челзи и Манчестер Сити нема да бидат исфрлени од Лигата на шампиони, како што се спомнува откако клубовите официјално ја формираа Суперлигата. Тој вели дека такво нешто едноставно е невозможно.
„Сто проценти сум сигурен дека Реал Мадрид, Манчестер Сити и Челзи нема да бидат исфрлени од Лигата на шампиони. Тоа не е возможно. УЕФА има монопол и треба да биде потранспарентна. Сакаме да го зачуваме фудбалот за наредните 20 години, сега е време на сериозна опасност. Победникот од Лигата на шампиони ќе добие 120 или 130 милиони евра, а со Суперлигата би заработувале многу повеќе“, вели Перес.
Тој потврди дека челниците на новата лига сигурно ќе разговараат со УЕФА и ќе им објаснат зошто фудбалот треба да се движи кон „подобар пат“.
„Ќе разговараме со УЕФА и тоа јасно го пишува во нашето соопштение, ние мора да разговараме бидејќи има уште пет слободни места за Суперлигата. Тие работеа на новиот формат на Лигата на шампиони, но тоа за мене е неразбирливо. Сакам да го спасам фудбалот, главна атракција се натпреварите на големите тимови. Фудбалот е како пирамида и оние кои најмногу заработуваат ќе можат да купат играчи за повеќе пари и со тоа и тимот ќе заработува повеќе. Ако големите тимови не заработуваат, тогаш помалку ќе заработуваат и оние помалите“, објасни Перес.
Тој истакна дека на фудбалерите кои ќе бидат дел од Суперлигата нема да им биде забрането да играат за репрезентацијата, бидејќи тоа едноставно нема да се случи.
