Претседателот на Реал Мадрид Флорентино Перез изјави дека Кристијано Роналдо бил најдобриот играч во историјата на овој клуб и исто така ја откри вистинската причина зошто Португалецот замина од клубот.
Роналдо минатата сезона по три последователни освоени титули во ЛШ го напушти Реал Мадрид и кариерата ја продолжи во италијански Јувентус со кој во првата сезона ја освои домашната титула во Серија А.
Сепак, главна цел на „Старата дама“ беше освојување на Лигата на шампиони каде Јувентус испадна од Ајакс, поради што челниците на клубот ја сметаат оваа сезона за недоволно успешна.
Бројките не лажат: Ова беше најлошата сезона на Роналдо по Манчестер Јунајтед
Перез доби исклучително интересно прашање – кој е најдобриот играч што го довел во Реал Мадрид - и без размислување рече дека тоа е Кристијано Роналдо, кој според него е и најдобриот играч на „Кралскиот клуб“ на сите времиња.
„Донесов многу играчи во Реал Мадрид, ама Кристијано Роналдо е најдобриот кој некогаш го носел дресот на ‘Кралскиот клуб’. Кога лани летото рече дека сака нов предизвик му излеговме во пресрет бидејќи никогаш не правел никакви проблеми и тоа е единствената причина зошто нѐ напушти. Ќе биде запаметен како најдобриот играч во историјата на Реал Мадрид“, искрен беше Перез.
Првиот човек на Реал Мадрид исто така рече дека со сите сили ќе се обиде да го донесе Еден Азар од Челзи и додаде дека Белгиецот веќе неколку години е на мета на „Кралскиот клуб“.
