Капитенот на репрезентацијата на Перу Паоло Гереро ќе го пропушти Светското првенство во Русија, откако доби едногодишна суспензија поради користење на кокаин, објави ФИФА.
Напаѓачот на бразилскиот Фламенго падна на допинг тест на 5 октомври после натпреварот со Аргентина во квалификациите за Мундијалот, а потоа 30 дена беше надвор од фудбалот пред новата казна.
Овој 33-годишен фудбалер нема да игра се до 3 ноември следната година, што значи дека нема да може да и помогне на репрезентацијата во првиот настап на Светско првенство после цели 36 години.
Гереро постигна пет погодоци во претходните квалификации и даде голем придонес во пласманот на Перу на шампионатот во Русија, каде стигна преку бараж, но без него во натпреварот против Нов Зеланд.
Поранешниот фудбалер на Баерн, Хамбург и Коринтијанс негираше дека користел недозволени средства, но ФИФА му изрече забрана врз основа на резултатите од допинг тестот.
Перу на Мундијалот ќе игра во група Ц со Франција, Австралија и Данска.
