Песната на Енцо против Французите стана хит за навивачите на Ривер Плејт

Синоќа на славниот „Монументал“ се играше натпревар од аргентинската лига во кој Ривер Плејт го пречека Ланус, а на полувремето имаше спектакл кога Енцо Фернандес во белиот дрес со црвена лента излезе од тунелот да ги поздрави навивачите.

Ривер Плејт е клубот каде Енцо Фернандес ја почна својата кариера уште во младинските категории, а три години играше и за првиот тим пред летото 2022 да се пресели во Бенфика. Само 6 месеци подоцна, по одличните игри на Мундијалот во Катар, премина во Челси.

Синоќа Енцо се врати да ги поздрави своите навивачи на „Монументал“, каде играше неговиот поранешен клуб Ривер Плејт. Навивачите громогласно го поздравија аргентинскиот херој и застанувајќи во негова одбрана по скандалот со песната што тој и дел од неговите соиграчи ја пееја на прославата по повод освојувањето на Копа Америка 2024, ја запеаја токму контроверзната песна во која се исмеваат фрнацуските фудбалери кои се деца на африкански имигранти.

„Играат за Франција, но нивните родители се од Ангола. Мајка им е од Камерун, а татко им е од Нигерија. Во нивниот пасош пишува Франција“, пееја навивачите на гигантот од Буенос Аирес.

Цела Аргентина се обедини во одбрана на Енцо Фернандес, а јавно поддршка му даде и потпретседателката Викториа Вижаруел, која истѕакна дека „нема колонијалисти да ни кажуваат што да пееме“, алудирајки на колонијалната експлоатација на Франција во Африка.

Претходно Фернандес се извини за пеењето.