Три песни од познатиот кантавтор Ѓорѓе Балашевиќ ќе влезат во српските учебници за музичка култура на издавачката куќа „Клет“.
Во учебникот за осмо одделение се најде „Drvena pjesma“, додека учениците од пониските одделенија на основните училишта ќе ги учат „D-moll и „Djevojku sa čardaš nogama“.
Маја Соколовиќ Игњашевиќ, еден од авторите на овие учебници за музичка култура, за Euronews.rs изјави дека песните на еден од најголемите текстописци на овие простори сигурно заслужуваат да се најдат во основните училишта, односно дека помладите генерации треба да го запознаат делото на овој поп музичар.
„Нашата цел беше да го приближиме Балашевиќ, но и други автори кои го задолжија нашето општество пред младите. Шабан Бајрамовиќ, Ѓорѓе Балашевиќ и Здравко Чолиќ се појавуваат во нашите учебници, како и бројни странски популарни бендови и автори. Во учебникот за осмо одделение, кој е одобрен и треба да биде објавен, има цело поглавје за популарната музика, каде ги вклучивме сите жанрови од џез, блуз, поп, рок, до хип-хоп“, рече таа.
Ѓорѓе Балашевиќ почина на 19 февруари, а неговите обожаватели масовно се собраа во многу градови на поранешна Југославија да запалат свеќа и да му оддадат почит на големиот музичар.