По 18 месеци од почетокот на пандемијата, Данска, Сингапур, Чиле, Јужна Африка и Тајланд се државите кои настојуваат да му се вратат на нормалниот начин на живот и да ги укинат рестриктивните мерки.
Данска
Од 10 септември, во Данска се укинати сите рестриктивни мерки, оценувајќи дека коронавирусот повеќе не е критична закана за општеството. Граѓаните можат да посетуваат угостителски објекти и ноќни клубови без ковид пропусници. Во јавниот превоз не е потребно да носат заштитни маски. Дозволени се собири без никакви ограничувања. За ова придонесе и вакцинацијата - до 13 септември целосно е вакцинирано 74% од населението.
Сингапур
Во Сингапур одлучија дека против пандемијата ќе се борат исклучиво со вакцинација. Епидемиолошкит емерки од јуни годинава не се применуваат. Ставот е дека коронавирусот никогаш нема да исчезне, но и покрај тоа може нормално да се живее.
Тајланд
Во минатата година беа регистрирани мал број на заболени во оваа држава, а тоа беше последица на рестриктивните епидемиолошки мерки. Најавено е дека од наредниот месец земјата повторно ќе се отвори за странски туристи, иако целосно се вакцинирани само 21% од населението.
Јужноафриканска Република
Јужноафриканските власти најавија дека ќе ги ублажат епидемиолошките мерки кои подразбираа физичка дистанца и забрана за собири на поголем број луѓе. Претседателот нагласи дека сега имаат доволен број на вакцини за возрасното население. Но, во оваа држава бројот на вакцинирани е мал, па претседателот ги повика граѓаните да се вакцинираат.
Чиле
Во Чиле е целосно вакцинирано 87% од населението, а во меѓувреме се планира и вакцинација со трета доза. Одобрена е вакцинација и на децата постари од шест години со вакцината на Синовак. И Чиле планира да се отвори за странските туристи.
