МЖСПП донесе Решение со кое Киселичката пештера, охридскиот Чинар, Дабот благун, Црната дудинка и геолошкиот локалитет кај Ѕвегор се прогласуваат за нови природни реткости во Републикава.
Решенијата за прогласување природните реткости се објавени во Службениот весник Број 174 од 22 август 2019 и во Број 205 од 7 октомври 2019, а Министерството за животна средина и просторно планирање денеска тоа го објави на својата официјална веб-страница.
Киселичката пештера се наоѓа во котлината Пијанец, во атарот на делчевското село Киселица. Пештерата се наоѓа на левата долинска страна на еден безимен поток кој припаѓа на сливот на Киселичка Река, десна притока на реката Брегалница. Главниот влез се наоѓа на надморска височина од 770 метри.
Чинарот во Охрид се смета за најстаро дрво во државава, а преданијата велат дека лично го засадил Св. Климент Охридски во 9-тиот век. Стручните лица сметаат дека дрвото е старо 6 века. Се наоѓа во Старата чаршија и претставува туристичка атракција.
Дабот од видот Благун е дрво кое се наоѓа во село Бели, кочанско. Староста на дрвото се проценува на околу 680 години иако никој не може со сигурност да каже кога и од кого е засаден. Обемот на дрвото е околу 10 метри, а пред да се скрши една од гранките распонот бил близу стотина метри.
Црната дудинка се наоѓа во дворот на манастирот Свети Гаврил Лесновски во село Лесново, пробиштипско. Од видот Morus nigras, важи за најстара дудинка во Македонија чија старост се проценува на скоро 6 века.
Карактеристичниот геолошки профил на карпи се наоѓа околу еден километар од селото Ѕвегор, делчевско. Се работи за специфична формација на карпи настанати по природен пат.
