По бламажата од 0:6 во првото коло, Беласица денеска гостува кај Работнички кој, пак, мора да го поправи впечатокот бидејќи во последните моменти доживеа пораз минатиот викенд.
Работнички загуби на гостувањето кај Македонија ЃП со гол во судиското надполнување, па денеска пред себе има императив победа против гостите од Струмица. Тој став го дели и крилниот напаѓач, брзоногиот Петар Петковски.
„Имавме несреќен финиш на мечот против Македонија ЃП. Работевме на отстранување на грешките во изминатите неколку дена, мораме да ја задржиме концентрацијата на потребното ниво во текот на целиот натпревар. Научивме дека секоја грешка се плаќа. Сега сме фокусирани на вториот предизвик, на гости ни доаѓа Беласица и нема да нè залаже нивниот убедлив пораз во првото коло. Максимално сме внимателни, но и мотивирани да одиграме квалитетен натпревар и да ги освоиме првите бодови во новата сезона“, вели Петар Петковски.
Натпреварот се игра на „Тоше Проески“ стадионот во Скопје со почеток од 17 часот. Директен пренос ќе има на МРТ1 и МРТ3.