Македонија е оставена на цедило, со големи проблеми, ограбена и со неплански проекти, рече денеска на прес-конференција Бране Петрушевски, пратеник на ВМРО-ДПМНЕ.
Според него, неодговорен е пристапот на претходната власт да се трошат 560 милиони евра за третата делница од пругата кон Бугарија долга 24 километри.
„Да, за 24 километри власта на СДС и ДУИ сакаше да потроши 560 милиони евра. Дали е оправдано? Секако дека не! Километар пруга според математиките на претходната власт би чинел над 23 милиони евра. Цената на чинење е само еден од проблемите. Пругата од 24 километри, треба да има 22 тунела, од кои последниот нема излез. Да, СДС и ДУИ предвиделе пругата кон Бугарија да завршува во тунел кој нема излез, затоа што од бугарска страна нема ниту проект за истата. Економски неоправдано е да се фрлат 560 милиони евра за пруга која завршува во тунел без крај. 560 милиони евра можат да се потрошат на модернизација на пругата од Табановце до Богородица и истата да може да се користи од возови кои би се движеле до 120 км/ч, а би чинела 250 милиони евра, односно на половина од тоа што СДС и ДУИ планирале за 22 километра пруга со тунел без крај“, рече Петрушевски.
