Американската компанија Pfizer објави дека заедно со партнерот BioNTech започнале со тестирање на вакцината против COVID-19 кај деца под 12-годишна возраст.
Компаниите се надеваат дека ќе ја прошират имунизацијата на таа возраст до почетокот на 2022 година.
Портпаролката на Pfizer, Шарон Кастилјо, потврди дека на доброволците во раната фаза од испитувањето им е дадена првата доза од вакцината во средата, пренесува Reuters.
Агенцијата наведува дека Pfizer и BioNTech планираат првично да ја тестираат безбедноста на нивната вакцина во три различни јачини, од 10, 20 и 30 микрограми за време на двофазното испитување со 144 учесници.
Компаниите планираат подоцна да ги прошират испитувањата со 4.500 учесници за да ја тестираат безбедноста, подносливоста и имунолошкиот одговор генериран од вакцината, веројатно со мерење на нивото на антитела кај млади лица.
Кастилјо додаде дека Pfizer се надева дека ќе има податоци од ова испитување во втората половина на 2021 година. Pfizer веќе ја тестирал вакцината на деца на возраст од 12 до 15 години, а компанијата очекува да ги има тие резултати во наредните недели.
Вакцината на Pfizer и BioNTech беше одобрена од американските регулатори на крајот од декември за лица постари од 16 години, а скоро 66 милиони дози од оваа вакцина се веќе дадени во САД, заклучувајќи ги вчерашните податоци од Центрите за контрола и превенција на болести на САД (CDC).
