Шумски гулаб со сини и бронзени перја кој обожава ферментирано овошје е прогласен за птица на годината за 2018 во Нов Зеланд.
Кереру е ендемски вид на гулаб во оваа земја и може да се најде на северните и на јужните острови, во градови и во руралните средини.
Кереру гулабите често паѓаат од гранки откако ќе се најдат премногу труло овошје што почнало да ферментира. Во лето, кога зреат овошките, понекогаш службите ги носат пијаните гулаби во азил за да се отрезнат. Групата за зачувување на животинските видови Forest and Bird ги опишува овие гулаби како „несмасни, пијани, стрвни и гламурозни“.
Кереру гулабите играат клучна улога во расејување на семињата на некои билки карактеристични за Нов Зеланд, токму поради фактот дека се едни од ретките видови кои можат да го голтнат целиот плод и да го исфрлат семето преку изметот.
Кереру гулабот беше очигледен победник на гласањето за птица на годината, со освоени 5.883 гласови.
Какапо папагалот е на второ место со освоени 3,772 гласови, а ретките птици Каки што постојат само во заробеништво се на трето место со 2.995 гласови.
Натпреварот го организираше групата Forest and Bird по 14-ти пат.
Ниту еден вид нема победено два пати, а годинава имаше најголем број гласачи, нешто повеќе од 48.000. Кереру гулабите до пред неколку години беа ловени поради месото и перјата, а сега се заштитен вид и е нелегално да се ловат и убиваат овие птици.
