Тирана, 23 септември 2018 (МИА) – Несекојдневен настан беше регистриран синоќа на Меѓународниот аеродром во Тирана.
Полетувањето на авион кон аеродромот „Малпенса“ во Милано беше одложено за дури пет часа поради тоа што капетанот на авионот Е.Л.(47) бил пијан.
- Лицето Е.Л. шпански државјанин, кој е капетан на авионот, кога патниците почнале да влегуваат во авионот, било приведено поради тоа што тој бил во алкохолизирана состојба. Колега на пијаниот пилот го пријавил во Граничната полиција и авиокомпанијата, по што бил блокиран летот, а патниците биле вратени назад, стои во полициското соопштение.
По барање на авиокомпанијата, направен е алкотест кој се покажал позитивен, бидејќи првиот тест покажал присуство на алкохол 0,35 мг/л додека вториот тест 0,31 мг/л.
Компанијата презела соодветни мерки и пијаниот пилот го заменила со друг и по пет часа од предвидениот термин авионот полетал за Милано.