Пилотите на авионот Boeing 737 Max на Ethiopian Arlines што се урна минатиот месец по полетувањето од Адис Абеба, се придржувале на упатството на Boeing за постапување во итни случаи, но сепак не успеале да ја вратат контролата над леталото, објави Wall Street Journal, повикувајќи се на прелиминарниот извештај за истрагата.
Весникот наведува дека пилотите се обиделе повторно да ја преземат контролата над леталото со исклучување на автоматскиот систем за летање наречен МКАС, кој го „туркал носот“ на авионот надолу.
Пилотите се обиделе и со рачна команда да го стабилизираат авионот, за на крајот повторно да се вратат на електронската команада.
По повторното вклучување на МКАС, авионот повторно го „туркал носот“ кон тлото.
Boeing не ја коментираше објавата на Wall Street Journal, во согласност со меѓународните правила да не коментира истрага која сѐ уште не е завршена.
При падот на авионот во Етиопија загинаа сите 157 патници и членови на екипажот.
Boeing ги објави упатствата за исклучување на МКАС по уривањето на ист таков авион во Индонезија пред пет месеци.
