По синоќешниот дебакл во кој лидерот Милан беше преслушан среде Милано од Аталанта, тренерот Стефано Пиоли признава дека за него Аталанта е нерешлива енигма.
„Мислам дека Аталанта е единствениот тим кој не можеме да го победиме. Тие јасно и гласно ни го загорчија животот“, почна Пиоли зборувајќи за Sky Sport Italia.
Аталанта синоќа со 3:0 се прошета низ Милано. Кристијан Ромеро во 26. минута го отвори резултатот, на 0:2 зголеми Јосип Иличиќ од белата точка во 53. минута, а кочените 0:3 ги постави Дуван Сапата во 77. минута. Деби за „Росонерите“ запиша новото засилуваше Марио Манџукиќ кога на 20 минути пред крајот влезе во игра, но не успеа ништо да промени.
„Почнавме добро, со многу играчи во офанзивата. Разочарувачки е начинот на кој го примивме првиот гол, а потоа вториот го реши натпреварот. Имавме време, но не можевме да се вратиме во игра“, додава Пиоли.
Инаку ова беше втор пораз за Милан сезонава во Серија А. Прв пат загуби од Јувентус пред три кола, исто така дома (1:3).
„Можевме да пружиме повеќе, знаевме дека треба повнимателно да се браниме, а чувањето не ни одеше како што треба, но требаше и да бидеме подобри при бликирањето на нафрлувањата. Аталанта беше подобра оваа вечер, пораз може да се случи кога се игра против силен тим. Разочарани сме, по вториот гол едноставно загубивме верба“.
Киксот на Милан синоќа не го искористи Интер кој одигра без голови на гостувањето кај Удинезе, па Милан останува прв, но сега со два бода предност пред градскиот ривал.
„Лигата е навистина компетитивна, знаеме дека е тешко, но ние сме таму на врвот и сакаме ние да го имаме главниот збор околу тоа“, заврши Пиоли.
