Златан Ибрахимовиќ конечно е во составот на Милан и се очекува вечерва да игра против тимот на СПАЛ.
Тренерот Стефано Пиоли потврди дека Швеѓанецот е спремен и со голема желба чека да истрча на зелениот терен. Тој се наоѓа на списокот на повикани играчи за дуелот вечерва во Ферара.
„Психолошки е во одлична состојба, добро ги одработува тренинзите. Тој е како лав, секогаш е воден од огромна мотивација и одлучност“, вели Пиоли за мотивираноста на Ибра.
Златан нема официјален настап откако се прекина калчото. За време на карантинот во Италија тој беше во Шведска каде слободно тренираше и играше контролни натпревари со Хамарби, но пред рестартот на Серија А се повреди.
Милан и без него во досегашните три натпревари одигра добро. Испадна од Јувентус во Копа Италија, но без да загуби, додека во лигата ги среди Лече и Рома постигнувајќи вкупно 6 голови.
СПАЛ и Милан играат вечер од 21:45 часот на „Паоло Маца“ стадионот во Ферара.