Тренерот на Милан бара од играчите на утрешното дерби да се однесуваат повеќе како Златан Ибрахимовиќ.
Швеѓанецот веројатно утре ќе истрча на „Меаца“ во дресот на Милан. Неговото присуство ќе биде голема надеж на „Росонерите“ кои во него гледаат главен адут за победа на големото дерби.
„Направивме сѐ за да го опоравиме, да оздрави од настинката и да ја надмине повредата на листот. До тука одеше сѐ по план, но сега недостасува уште последниот чекор, а тоа е да одработи цела тренинг сесија со тимот. Доколку денешниот тренинг го одработи без проблем, тогаш сигурно ќе биде во тимот утре“, рече тренерот Стефано Пиоли на денешната прес-конференција.
„Сите натпревари се подготвуваат за да се извојува победа, но овие натпревари вредат повеќе. За да се победи на дерби потребно е да се игра подобро, така шансата е поголема. Тоа е нашата цел. Факт е дека Интер направи многу повеќе од почеток на првенството сѐ до декември“, реален е стратегот на Милан.
„Не знам моментално колку голема е разликата помеѓу нас и нив. Ќе му се спротивставиме на еден тим кој нема загубено долго време. Утре треба да го имаме ставот на Ибра, подготвеност и решителност: сакам тим кој ќе одигра на највисоко ниво од своите способности без разлика дали Ибра ќе игра“, вели Пиоли.
Интер и Милан играат утре со почеток од 20.45 часот.
