Со вчерашната победа во последните моменти од натпреварот, Милан, неочекувано за многумина, оди на мини-пауза како лидер во Серија А.
Нормално, голема заслуга за резултатите оди кај тренерот Стефано Пиоли кој е мозокот позади добрите игри.
„Многу сум горд на моите момци. Правиме нешто многу важно. Со Ибра на терен сме многу посилни, но го вадиме најдоброто од сите и без него. Упорноста да пробуваме да дојдеме до победата сѐ до крајот е она кое нѐ носи“, вели тој.
Синоќа со голот на Тео Ернандес на „Меаца“ падна Лацио кој до 92. минута имаше 2:2.
„Свесни бевме дека мораме силно да притиснеме на крајот и успеавме“.
„Заслугата за овие игри? Таа е на клубот кој ни овозможува најдобри услови за работа. Потоа на стручниот штаб кој ми стави на располагање млади, но подготвени момци кои можат уште да се подобрат“.
Беше запрашан и дали Милан ќе се засилува за време на зимскиот преоден рок оглед на тоа што сега тимот е во битка за Скудетото.
„Доколку постојат услови ќе пробаме да го подобриме тимот, но јас и вака сум задоволен. Тоа е поради фактот што ние можеме уште да се подобриме со она што го имаме. Оганот кој гори во нас ја прави разликата на терен и мораме да го чуваме запален“, смета стратегот.
