Тренерот на Милан откри дека судијата Марко Сера им се извинил на неговите фудбалери поради поништувањето на голот за победа, која потоа се претвори во пораз.
Милан синоќа доживеа неверојатен пораз од 1:2 среде Милано од малата Специја во 22. коло од Серија А.
Главниот судија Марко Сера го поништи голот на Месиас при крајот на натпреварот откако досуди слободен удар поради фаул над Анте Ребиќ. Кога Хрватот беше фаулиран топката дојде до Месиас, кој веднаш упати удар и постигна гол, но судијата во меѓувреме ја прекина играта судејќи фаул за Милан.
Грешката на судијата е што не почитуваше предност, односно требаше да ја остави играта и да види дали Милан ќе остане во напад, ако не, потоа да ја прекине за слободен удар.
Играчите на Милан беа бесни на ваквата одлука, а моменти подоцна Ганецот Емануел Џаси постигна победнички гол за Специја за триумф на „Џузепе Меаца“.
„Пробав да ги смирам играчите, но не успеав. Тоа го докажува и голот на Специја“, вели Стефано Пиоли говорејќи за Dazn.
„Знаевме дека е неправда, потоа и сами сме си криви, но вината ја делиме со судијата. Жал ми е што го кажувам ова. Тој дури и ни се извини, можеби тоа дури и не ни беше фаул. Штета“.
„Како и да е, требаше да постигнеме повеќе голови во првото полувреме. Ова беше лоша ноќ и сега мора да реагираме“.
Капитенот Тео Ернандес промаши пенал во последната минута од првиот дел, а само минута подоцна Рафаел Леау го отвори резултатот. По паузата Кевин Агудело израмни во 64. минута.
„Требаше да победиме, а некако успеавме да загубиме. Тешко ни е. Знаевме дека имаме добри шанси, голот на Леау требаше да ни влее самодоверба, не успеавме да ја завериме победата која силно ја посакувавме. Но, сезоната сѐ уште е долга“, оптимист е Пиоли.
Следува тешок распоред за „Росонерите“ бидејќи в недела играат со Јувентус, а потоа ги чека градското дерби со Интер.
„Не заслуживме да загубиме, наша грешка беше голот за израмнување. Тоа е она што треба да го поправиме. Овој натпревар ќе ни даде мотивација за наредните предизвици“, заврши Пиоли.
Со победа синоќа Милан ќе избиеше на првото место на табелата бидејќи Интер ремизираше со Аталанта и разликата стана два бода. Но, „Росонерите“ ја прокоцкаа шансата, па сега останувата втори со 48 бодови, два помалку од Интер и напревар повеќе од лидерот. Специја, пак, сега има 22 бода и е 14-та.
