Предводникот на Јувентус призна дека Интер завршил подобра работа сезонава и воедно повеќе ја посакувал титулата која и успеа да ја освои.
Во пресрет на утрешната мега-пресметка, популарното Дерби д'Италија помеѓу Јувентус и Интер, двајцата тренери одржаа прес-конференции, а погледот беше насочен кон оној кој потфрли, Андреа Пирло.
Ако за Интер утрешниот натпревар е само за дерби престиж, за Јувентус воопшто не е така. „Старата дама“ грчевито се бори за место помеѓу првите четири и пласман во Лигата на шампионите, а моментално е надвор од таа зона бидејќи е на 5. место.
„Интер одиграа многу подобро, беа многу поконзистентни и погладни од нас. Жалам што некои играчи не ги имав на располагање, но жалењето е дел од амбицијата“, рече Пирло.
„Утре ќе му се спротивставиме на новокрунисаниот шампион на Италија и тоа ќе ни даде мотив. Да не заборавиме дека ние играме за место во Лигата на шампионите, но како и да е, Интер ќе оди на победа“, додаде.
Јувентус излезе од топ 4 со поразот од Милан во неделата, но потоа завчера славеше на гости кај Сасуоло и остана во игра.
„Гледајќи ја играта во средата ни сугерира дека ни е жал што не освоиме повеќе бодови со останување фокусирани како што тоа го направивме во Реџо Емилија“.
Пирло најави и дека од првата минута ќе настапи со Алекс Сандро, а и дека подготвен за настап најверојатно ќе биде и Федерико Кјеза. Назад во тимот ќе биде и Мерих Демирал.
Натпреварот се игра на „Алианц“ стадионот во Торино со почеток во 18 часот, а правдата ќе ја дели Џанпаоло Калварезе.