Дуелот со Ференцварош во Торино за Андреа Пирло значи само едно - победа, бидејќи на тој начин Јувентус уште вечерва ќе си обезбеди место во осминафиналето.
Од 21 часот на „Алианц“ стадионот во Торино екипата на Јувентус го пречекува унгарскиот шампион кого пред репрезентативната пауза со 4:1 го среди среди Будимпешта. Убедливата гостинска победи на некој начин навестува дека „Старата дама“ и денеска не би требала да има проблеми, но сепак, победата треба да се одработи.
„Мораме да му пристапиме на натпреварот на најдобар можен начин. Пад во концентрацијата е недозволен. Сакаме да си обезбедиме пласман во наредната фаза што е можно порано. Имаме некои отсуства во одбраната, но останатите се тука и ќе играат оние кои се во најдобра форма. Дибала си ја бара формата, а за тоа е потребно време. Пред натпреварот ќе видиме дали ќе игра од почеток или не“, вели Пирло.
Линијата пред голманот Војчех Шченсни ќе биде без искусните Леонардо Бонучи и Џорџо Кјелини кои се повредени.
„Ова ќе биде одлучувачки натпревар. Гостувањето кај нив беше добро, но сега е важна само сегашноста. Размислуваме за различни решенија во нападот. Ќе се обидеме да играме со Дибала, Кристијано и Мората, но нив им треба време за да навикнат на играње сите заедно“.
Јувентус има 6 бодови и со победа вечерва ќе има 9, па доколку киевски Динамо не приреди сензација и ја совлада Барселона, Јуве на две кола до крајот ќе обезбеди пласман во осминафинелето и мирни последни две кола.
„Важно е сега да обезбедиме пласман во осминафиналето бидрејќи тоа ќе ни овозможи да ги одмориме оние стандардните кои играат цело време од почеток на сезонава“, завршува стратегот на „Бјанконерите“.