Со убедлива победа од 3:0 против Сампдорија новиот стратег на „Старата дама“ најави дека неискуството нема да му биде пречка во походот кон одбраната на титулата.
Актуелниот шампион Јувентус синоќа победнички ја почна новата сезона во Серија А. Предводен од легендарниот Андреа Пирло, на кого ова му е прв сериозен предизвик во тренерската кариера, немаше проблеми со гостите од Џенова.
Уште по 13 минути игра се затресе мрежата на Самп откако по еден неуспешен продор на Кристијано Роналдо топката дојде до Швеѓанецот Дејан Кулушевски кој без многу размислување од прва ја смести зад грбот на Емил Аудеро. За него ова беше гол во деби натпревар откако летово пристигна во Торино.
Јуве ја контролираше играта не дозволувајќи му на противникот сериозна шанса, но на вториот гол се чекаше дури до 78. минута кога по една мешаница Леонардо Бонучи се најде на вистинското место.
Конечните 3:0 ги постави Кристијано Роналдо на две минути пред крајот.