Поранешниот играч од средниот ред го привршува курсот за добивање на УЕФА Про тренерска лиценца по што од септември треба да седне на клупата на вториот тим на Јувентус.
Андреа Пирло влегува во тренерските води. Откако се пензионира во 2017 година, сега 41-годишниот Пирло активно се подготвува да стане тренер. Во Коверчано тренинг центарот на ФИГЦ во истоименото предградие на Фиренца, Пирло посетува тренерски курс кој ќе му ја донесе потребната УЕФА Про лиценца со која ќе може да води тимови од било кои категории.
Планот на Јувентус е Пирло да го преземе вториот тим на клубот, односно Јувентус У23 кој се натпреварува во третата лига Серија Чи. Треба да го замени Фабио Пекија кој изминатава прекината сезона го внесе клубот во баражите за пласман во Серија Би каде Јуве У23 синоќа доживеа елиминација откако одигра 2:2 со Карарезе.
Пирло за Јувентус настапуваше 4 сезони, од 2011 до 2015 и во сите сезони го освои Скудетото, како и по еднаш Копа Италија и Суперкопа Италијана.
Јувентус е единствениот клуб во Италија кој има и втор тим кој се натпреварува во погорните лиги.