И покрај тоа што избраниците на Солскјер триумфираа на гости кај лутиот ривал Манчестер Сити, сепак „Граѓаните“ се тие кои отпатуваа во финалето по одбрана на трофејот.
Со голот на Немања Матиќ постигнат во 35. минута Манчестер Јунајтед успеа да диојде до триумф на гости кај градскиот ривал Сити, но не успеа да го елиминира и да се избори за финале.
Згора на тоа, од 76. минута играше и со фудбалер помалку откако токму Матиќ поради втор жолт картон мораше предвреме да го напушти теренот.
„Граѓаните“ славеа победа од 3:1 на првиот натпревар на „Олд Трафорд“ и затоа и со овој пораз на крајот имаа причина за славје. На тимот на Оле Гунар Солскјер му беше потребен уште само еден гол за да дојде до финалето, но не успеаја по вторпат да го најдат патот до мрежата на Клаудио Браво.
Во финалето закажано за 1 март Манчестер Сити ќе се сретне со Астон Вила која, пак, изненади со елиминацијата на Лестер. Сити е актуелен бранител на трофејот од Лига купот откако го освои лани, но и преклани. „Граѓаните“ имаат вкупно 6 пехари и само едно загубено финале (во 1974).