Писмо во ракопис во кое Алберт Ајнштајн зборува за концептот за религијата, ги надмина сите очекувања и се продаде за 2,9 милиони долари на аукција.
Така нареченото „Писмо за Господ“ што датира од 1954 година, се очекуваше да достигне цена од 1,5 милиони долари на аукцијата во Њујорк.
Нобеловецот Ајнштајн, кој тогаш имал 74 години, го напишал писмото на една и пол страница до германскиот философ Ерик Гуткинд, како реакција на еден од неговите трудови.
Писмото напишано на германски јазик се смета за клучен елемент во дебатата меѓу науката и религијата.
„Ова неверојатно искрено, приватно писмо Ајнштајн го напишал една година пред неговата смрт и до ден-денес е беспрекорен израз на неговите религиски и философски ставови“, стои во соопштението од аукциската куќа Christie's.
„Зборот Господ за мене не е ништо друго освен израз и производ на човековата слабост. Библијата е збирка легенди достојни за почит, но сепак примитивни“, напишал Ајнштајн.
„Ниту едно нејзино толкување, колку и да е суптилно, за мене нема да направи никаква разлика во врска со ова“, продолжува Ајнштајн.
Физичарот исто така зборува и за неговиот идентитет како Евреин и напишал дека јудаизмот е „како и сите други религии, инкарнација на примитивни суеверија“.
„Евреите, со кои гордо се идентификувам и во чиј менталитет сметам дека сум длабоко закотвен, сепак за мене немаат поинаков вид на достоинство во споредба со другите луѓе“, напишал Ајнштајн.
Писмото се продаде заедно со уште неколку други писма и белешки на Ајнштајн, меѓу кои белешка од 1928 година што се продаде за 103.000 долари, во која ги изложува неговите размислувања за третата фаза од неговата Теорија на релативноста.