Дефанзивецот на Стоук, Ерик Питерс, го пропушти натпреварот против Евертон во саботата, кој неговиот тим го изгуби со резултат 2:1. Според британските медиуми, стандардниот лев бек на Стоук не беше во составот поради тоа што ги прекршил клупските правила.
Тренерот Пол Ламберт имал намера да го стартува Ерик Питерс во натпреварот против Евертон, но во последен момент се одлучи неговото место да го заземе Гркот Костас Стафилидис, откако дознал дека Питерс се забавувал до доцна во ноќта во петокот.
Англиските медиуми не потврдија ништо освен тоа дека Питерс бил излезен во ноќните клубови заедно со неговата жена до доцна во петокот навечер, па затоа Ламберт пресудил дека тој нема да биде доволно спремен за натпреварот против Евертон. Никој не потврди дека Питерс бил под дејство на алкохол вечерта, но медиумите шпекулираат дека токму тоа е причината поради која левиот бек беше изоставен од составот.
Откако дојде на клупата на Стоук, Пол Ламберт го постави правилото кое го преферираше и во минатите клубови каде беше тренер, кое вели дека играчите не смеат да бидат присутни на место во кое се сервира алкохол во период од 48 часа пред натпреварот.
Стоук го загуби мечот на домашен терен, со резултат 2:1, а двата гола за Евертон ги постигна новото засилување од Турција, Ченк Тосун.
