Италијанската полиција ја разби неонацистичката група “Werwolf”, која наводно планирала напади врз високи функционери, вклучувајќи го и убиството на премиерката Џорџа Мелони.
Еден 19-годишен маж е меѓу уапсените кои се осомничени дека го планирале атентатот на Мелони.
Во голема акција на италијанската полиција уапсени се 12 членови на неонацистичката група “Werwolf”, обвинети за различни кривични дела, меѓу кои поттикнување насилство, негирање на холокаустот и расна дискриминација.
Групата, која има членови во различни италијански градови, беше цел на полицијата под раководство на Специјализираните антитерористички единици, пренесуваат медиумите во светот.
Уапсени се 12 лица, додека 25 претреси се извршени низ цела Италија.
Членовите на групата, на возраст од 19 до 76 години, биле инспирирани од истоимената нацистичка организација, која дејствувала на крајот на Втората светска војна.
Според истрагата, преку каналите на Телеграм планирале „поттикнување на субверзија на постоечкиот економски, социјален и правен поредок“ и воспоставување авторитарен режим врз основа на „ариевската раса“.
Тие планирале насилни акции, вклучително и напади врз високи функционери, а премиерката ЏорЏа Мелони и економисти од Светскиот економски форум биле меѓу целите, според написите.
