Мисијата на Intuitive Machines заврши порано од планираното откако лендерот Athena се преврте на површината на Месечината, но тоа не е единствената штета.
Како што е познато, лендерот Athena се преврте на површината на Месечината на 6 март и сепак испрати фотографија, која за жал беше доказ за неговата неповолна положба која го спречи да генерира енергија. Затоа, мисијата заврши само еден ден по слетувањето на лендерот.
Сепак, овој инцидент не значеше само пропаст за лендерот, бидејќи во неговата утроба се наоѓа и минироверот Mobile Autonomous Prospecting Platform (MAPP). Тој, исто така, успеа да испрати корисни податоци на Земјата пред недостатокот на енергија да му ја заврши мисијата, но не можеше да излезе на површината на Месечината.
Компанијата Lunar Outpost, која го поседува минироверот, соопшти дека собрала податоци и дека бил подготвен за возење. Успеа да го преживее слетувањето, но позицијата на лендерот Athena го оневозможи неговото излегување.
Станува збор за ровер долг 45 сантиметри кој носел различни товари. Планот беше да се тестира LTE/4G комуникацискиот систем на Nokia за Месечината и да се соберат мало количество примероци кои требаше да ѝ бидат продадени на НАСА за симболичен 1 долар, што требаше да создаде правен преседан за користење на вселенските ресурси.
За жал, ниту една од овие цели нема да се постигне, но податоците од MAPP собрани на патот од орбитата на Месечината до површината го потврдија функционирањето на голем број системи и компоненти, кои ќе бидат корисни за претстојните мисии на компанијата Lunar Outpost.
„Со нетрпение очекуваме нови мисии, вклучително и Lunar Voyage 2 за истражување на месечевиот регион Рејнер Гама, како и враќањето на јужниот пол на Месечината во мисијата Lunar Voyage 3. Исто така, тука е и првата мисија на австралиски ровер на Месечината, под името Lunar Voyage 4. Со оглед на способностите прикажани во вселената, со нетрпение очекуваме да покажеме што нашите системи за мобилност можат да постигнат“, соопштија од Lunar Outpost.
Intuitive Machines има намера да ја лансира својата трета мисија подоцна годинава, која ќе го носи роверот Lunar Voyage 2 во вселената.
Lunar Outpost се натпреварува за договор на НАСА за производство на ровер наменет за пробна мисија пред мисијата Artemis 5 на НАСА планирана за 2030 година.
