Акционерите на Tesla го одобрија договорот за огромна исплата на главниот извршен директор Елон Маск што се проценува на 2,6 милијарди долари.
Ова се смета за највисоката договорена сума за исплата врз база на акции во корпоративната историја на САД.
Маск ќе ја добие платата само ако Tesla ги исполни зацртаните цели, како продажбата и вредноста на акциите.
Гласањето на одборот на акционери се сметаше за голем тест на доверба и поддршка за Маск и неговата кадарност да ја води компанијата за производство на автомобили што моментално работи со загуба и се мачи да ги постигне производствените цели.
Некои големи акционери рекоа дека ќе го поддржат предлогот, но истакнати консалтинг групи велат дека сумата е премногу висока.
Маск, кој поседува една петтина од компанијата за електрични возила, не учествуваше во гласањето.
Вредноста на акциите на Tesla порасна за 3% откако беше објавено гласањето. Околу 73% од гласовите беа во полза на планот во кој не се сметаат акциите на Маск и брат му.
Во десетгодишниот план се предвидува дистрибуција на акциите во транши. За да ја добие Маск платата од 2,6 милијарди долари, вредноста на акциите на Tesla мора да се качи на 650 милијарди долари. Компанијата моментално има пазарна вредност од околу 55 милијарди долари.
Покрај импресивниот раст на вредноста на акциите, Tesla уште нема остварено профит и има проблеми со испораката на предвидената количина автомобили.