Илјадници луѓе излегоа денеска на улиците на Мадрид барајќи повисоки плати поради зголемената инфлација и цените на енергијата.
Демонстрантите вееја црвени синдикални знамиња и свиреа на тапани додека се движеа кон Плаза Мајор, централниот плоштад во Мадрид, носејќи голем транспарент на кој пишуваше: „Плати или штрајк“.
Полицијата процени дека околу 25.000 луѓе учествувале на протестот, кој го организираа двата главни шпански синдикати, CCOO и UGT.
„Или ќе има зголемување на платите или работните конфликти ќе пораснат експоненцијално во нашата земја во текот на следната година“, им рече на новинарите на протестот генералниот секретар на CCOO, Унаи Сордо.
Инфлацијата расте во Шпанија
Како и другите земји, Шпанија се соочува со зголемена инфлација, која делумно е предизвикана од последиците од војната во Украина и повторното отворање на економијата по целосното исклучување за време на пандемијата на коронавирус.
Инфлацијата во Шпанија достигна врв во јули на 10,8 отсто, што е највисока стапка забележана во последните 38 години, пред умерено да забави до 7,3 отсто во октомври, сè уште над нормалното ниво.
„Платите се сè уште екстремно ниски, додека цените за многу потребната храна вртоглаво пораснаа“, изјави 57-годишната сервисерка Марија Луиза Ортега за Франс прес на протестот. Таа додаде дека растот на платите треба да одговара на растот на инфлацијата.
Левичарите бараат зголемување на минималната плата
Протестите во Шпанија избија во време кога левичарската влада преговара со синдикатите и деловните актери за ново зголемување на минималната плата, која моментално изнесува 1.000 евра месечно. Екстремно левичарската партија Podemos (Можеме), помал партнер во коалициската влада на социјалдемократот Педро Санчез, бара зголемување на минималната плата за 10 отсто.
Но, главната деловна асоцијација во Шпанија, CEOE, ја отфрли можноста зголемувањето на платите да одговара на инфлацијата, велејќи дека тоа ќе им наштети на компаниите, особено на помалите, но дека сепак е подготвена да преговара за скромно зголемување.
Владата вети дека ќе ја зголеми минималната плата на 60 отсто од просечната шпанска плата до крајот на нејзиниот мандат во декември 2023 година, со што ќе се усогласи со нејзините европски соседи.